Un bishita di Kunukuman na Minister di GMN

26 di april 2022, un delegashon konsistiendo di Kunukuman, Michael i Roel tabata di bishita serka minister Dorothy Pieters-Janga di Salubridat, Medio Ambiente i Naturalesa. Tema di e enkuentro naturalmente tabata e shushedat enorme kausá pa e hecho ku ta tira afval manera, bòter di glas i di plestik, bliki i demas shushi rònt Korsou. E Minister tabata kontentu di por a topa Kunukuman kara kara pa interkambiá di pensamentu ku otro.

Ku antisipashon a presentá algun puntonan di atenshon di kual algun a keda tratá.

Un di esnan mas importante ta di informá pueblo ku no por sigi asina’ki. Bo ta shusha bo mes kama.

Pwes e manera di pensa i e mentalidat di e pueblo mester kambia i bira mihó. E Ministerio lo bai kuminsá ku un kampaña di informashon. Importante ta tambe pa menshoná e numbernan di telefòn di instanshanan ku ta atendé kasonan di delito kontra Medio Ambiente i di rekohé kadaver. Tambe e wèpsait di Selikor mester ta publiká  na papiamentu i hulandes. Risaikel tambe ta hopi importante i ta bai buska un solushon pa esaki.

E proposishon pa pone konteinernan na e lokalidatnan apropiá ta wordu investigá. Drum i klikko no ta e mihó opshonnan pa depositá afval. Nan ta difísil pa hasi bashí i ta jamativo pa vandalismo. Ministerio por paga pa solamente 1 biá for di e budget.

Minister a indiká ku na playanan grandi, minimalmente 1 biá pa siman Selikor ta rekohé shushi. Nos a bisa ku esei hopi biá ta tiki. LVV tambe ta rekohé 1 biá pa siman.Pero e autonan ku ta transportá e shushi hopi biá ta kore sin tapa e afval ku un net, ku e konsekuensia ku mitar di e shushi ta bula bai i keda atras riba kaya publiko i den nos naturalesa bek. Pwes mester proponé LVV pa tapa e shushi ku un net ora ta transportá shushi.

Bakinan di glas tambe ta un punto di atenshon. Simplemente tin muchu tiki riba e isla. Minister ta di akwerdo ku esaki i ta bai tuma akshon sigur pa remediá e situashon aki mas rapido posibel. E bakinan aki mester keda ubiká na lugánan sentral i mester duna publisidat na esaki.

Micheal ta trese dilanti ku mester bai prohibí uso di materialnan di plestìk manera tas, rietje i bakinan di foam. Esaki tambe ta un asuntu ku ta wordu atendé den parlamento. Pwes e tin nan atenshon.

Pero loke ta primordial, i ku esaki tur hende ta di akuerdo, ta informashon na pueblo i soru pa e mentalidat kambia.

Resumiendo, un kombersashon konstruktivo ku Minister i su staf. Nos a eksperensiá esaki komo hopi positivo.