#200 Caracasbaai

Awe, 12 di yanüari 2025, a tuma lugá Edishon nr. 200 di akshon di limpiesa di The Kunuku Man. Un hecho pa selebrá? Nò, naturalmente ku nò! No ta un kos si selebrá ku tur djadumingu un team di boluntario ta piki shushi ku otronan sin ningun reserva ta tira riba kaya, den mondi i na playa.
Pero ya, nos ta hasié tòg! Un grupo grandi di boluntario ku riba djadumingu ta tuma e molèster di bai limpia un pida di Kòrsou. Hopi apresio!

Awe pwes pa di 200 biaha! 200 biaha, realisá esaki bon! 200 biaha!

Siman pasá The Kunuku Man no tabata sinti muchu bon, e biaha aki ta e trük ku no ké a start. Pwes no por a hiba tur materiaal nesesario pa e limpiesa na Caracasbaai. Pero dor di improvisá un poko e boluntarionan por a hasi un tiki limpi pa tòg akumulá un total bergonsoso di 121 kilo na glas i shushi ku ta bula.

Un area chikitu pwes pa loke ta trata limpiesa. Despwes di esei tabata ora pa bolo ( ya ku kon ku bai bin ta trata tòg di un hubileo) i TeleCuraçao a entrevistá The Kunuku Man i a hasi un reportahe di e ambiente ku tabata reiná entre e boluntarionan.

Pa clausurá e team a risibí un lunch obsekio di Pasawá Foodcourt, na Caracasbaaiweg.
Kuminda tabata dushi i diferente hende a tira un speech.

Ademas tur boluntario a risibí un envelop ku kontenido obsekio di The Kunuku Man.
E kontenido tabata un repartishon di e premio ku The Kunuku Man a risibí di MCB bank na fin si aña pasá.

Un bunita klausura di un hubileo tòg partikular.