Gobièrnu ta hasi su parti, awor ban tene Kòrsou limpi!!

Copyright: Èxtra

WILLEMSTAD.- Den e fin di siman ku a pasa gobièrnu di Kòrsou pa medio di Minister di Salubridat, Medioambiente i Naturalesa ofisialmente a start ku e kampaña “Di bo, Pa bo, Ku bo” ku e ophetivo pa konsientisá i yuda hasi i tene nos isla limpi di shushedat. Un kantidat di persona a bini huntu djasabra mainta na Weg naar Fuik unda gobièrnu a pone e promé sinku kònteinernan pa pueblo por bai depositá nan shushi sin tin mester di tira shushi kantu di kaminda i den mondi. Na e okashon aki Minister di GMN sr. Javier Silvania a trese dilanti ku esaki ta parti e esfuersonan ku tin di parti di gobièrnu ku a kuminsá ku e espasio pa depositá shushi grátis na landfill Malpais.

E proyekto aki ta unu ku a eksigí hopi preparashon i ta huntu ku su demas koleganan di gabinete Pisas nan ta hasi un ke otro posibel. Naturalmente un proyekto manera esaki tin su gastunan envolví, i gobièrnu a reservá inisialmente un 100 mil florin, aunke di parti di Minister Shalten Hato nos a komprondé ku for di e Fondo di Kriminalidat tambe a reservá un 200 mil florin mas. Pero fondonan lo no mester ta un problema den un proyekto manera esaki ku ta regardá limpiesa di nos isla. Segun sr. Silvania e ta hopi orguyoso di e proyekto aki pasobra ta huntu nos mester ban tene e lugá aki limpi.

E ta hopi kontentu tambe ku gruponan ku tin hopi aña kaba ta sakrifiká nan tempu pa tene Kòrsou limpi, i nan tambe ta duna nan granito i djòin gobièrnu den e kampaña aki pa por hasi limpiesa. Manera e kampaña ta bisa, ku e ta algu “Ku bo, Pa bo, Ku bo”, pues pa nos tur tur i komo tal e ta spera di haña sosten di barionan.

Tin hopi inisiativa ku pa basta tempu ta sali for di barionan mes, ku e meta pa limpia bario. Ta hopi grupo chikí tin ta sali regularmente i rekohé shushi den bario. Echo ta ku nos tur ta realisá ku Kòrsou no ta limpi i ku mester hasi kambio pa ku e maneho di limpiesa mes. E solo echo ku un baki grandi di shushi a yena denter di 15 minüt ya ta un indikashon kla ku e pueblo tin nesesidat pa por tin fasilidat pa tira shushi den su mes bario. Ademas e echo ku a habri landfill pa 2 luna pa por tira shushi pòrnada ta otro prueba. Por mira kon tin un kantidat di vehíkulo ta bai tira shushi. Pues mester di un kambio di maneho pa ku limpiesa.

Sr. Silvania a anunsiá i antisipá ku gobièrnu di Kòrsou lo bini ku un maneho nobo kaminda huntu ta bai hasi Kòrsou mas limpi. A kuminsá pariba di nos isla, pero lo sigui bai tantu meimei komo pabou di Kòrsou.